Furnëde ncantëur te Südtirol cun i mesuns de trasport publics y cunescëde i vantajes dl sistem de trasport ntegrà
L viagiadëur à l dërt al trasport dal mumënt che l zapa tl mesun publich y à tla mans na cherta de viac valëivla.
L viagiadëur muessa tenì sù la cherta de viac y cialé che la vëta manietica ne vënie nia danejeda y n ne possa nia liejer i dac.
La chertes de recunescimënt muessa unì prejentedes sce damandedes dal sciafer o dal personal respunsabl dl cuntrol, adum cun n documënt d’identità. Chësc ne vel nia per chi che ne à mo nia cumplì 14 ani. Per chisc iel assé mustré la cherta de recunescimënt.
I viagiadëures ie respunsabli per i danns gaujei ai mesuns, a terc y al servisc.
La lueges da senté ie resservedes dantaldut ala persones cun handicap, al’ëiles che aspieta, ala jënt de tëmp y ai viagiadëures cun mutons.
L trasport ne vën nia cunzedù ala persones che refudea la prescrizions n cont de orden y dla segurëza dl servisc, a chëles che ufënd la dezënza, desturba i autri viagiadëures, vënd bëns y prudoc sun l mesun de trasport, che cianta, sona o fej ativiteis semientes. Tl cajo che chësta despusizions ne vën nia respetedes y la situazion ie tela da scunsië che l viac vede inant, possa l sciafer o l personal de cuntrol damandé l ntervënt dla forzes dl orden.
Tl cajo che l viagiadëur y utënt dl servisc de trasport publich fej azions che mët tl pericul la segurëza y la regularità dl servisc, à l cuntrolëur o l sciafer la rejon, aldò de si valutazion persunela, de ti tò la cherta de viac al viagiadëur tl cajo che chësta ie numinativa o de ne l lascé no viagë inant, sce l se trata de na persona che à cumplì la majera età.
Per chël che reverda l cumpurtamënt di viagiadëures di servijes dl trasport publich, val n forza l titul II dl DPR 11.07.1980, n.753, sun la “normes n materia dla polizai, segurëza y regularità dl eserzize dla ferates y di autri servijes de trasport” che vëij danora l’aplicazion de sanzions aministratives n cajo che la normes ne vën nia respetedes.
