Südtirol Mobil | Mobilità Alto Adige

L Südtirol Pass ie n titul de viac persunel, nia trasferibl, che n possa adurvé sun duc i mesuns dl sistem de trasport ntegrà de Südtirol.

La tarifa per l Südtirol Pass se defrenziea ti cater livei tlo cumpedei su:

1. da 1 a 1.000 km: 8 cent per chilometer;
2. da 1.001 a 10.000 km: 4 cent per chilometer;
3. da 10.001 a 20.000 km: 2 cent per chilometer;
4. da 20.001 km: 0 cent per chilometer.

L Südtirol Pass vën dat ora debant.

L paiamënt dla tarifa possa unì fat tla manieres defrëntes:

• la ciarian su da n cont virtuel paian na cauzion de 10,00 euro. Da chësc cont uniral trat ju la soma per uni viac. Sce la soma che ie sun l cont ne ie nia assé per paië la tarifa damandeda possen mpò finé l viac. La soma che n ie debit unirà rateda ju dala proscima reciarieda dl cont ntegran la depusizion dla cauzion;
• tres n orden de banca permanënt (SEPA-SDD): la soma che n ie debit per i viages fac unirà trata ju dal cont curënt de banca dl utënt, aldò dla manieres stabilides tl cuntrat.

L Südtirol Pass vel n ann alalongia dala prima cunvalidazion.

La validità anuela ie renuveda automaticamënter.

Tl tëmp de n ann dala destumeda dl Südtirol Pass iel puscibl se damandé l rembursamënt dla somes nia adurvedes dajan ju l titul de viac.

Südtirol Pass per families

Per la families cun almanco un n mut/una na muta nchin 18 ani vën l Südtirol Pass pità ala tarifes alesiredes tlo cumpededes su:

• da 1 a 1.000 km: 6 cent per chilometer;
• da 1.001 a 10.000 km: 3 cent per chilometer;
• da 10.001 a 20.000 km: 2 cent per chilometer;
• da 20.001 km: 0 cent per chilometer.

L Südtirol Pass per families possa unì damandà per uni cumëmber dla familia che nen à l dërt sce l presentea n documënt d’identità y n zertificat anagrafich o na detlarazion sostitutiva curespundënta, o n documënt da chël che l resultea l stat de familia. La rejon de se damandé l Südtirol Pass per families à:

• i genitores o chi che dejëuj mpede ëi la ncëria dl’educazion;
• i mutons/la mutans nchin al’età de 18 ani.